Теміртауда «Таза су айдындары» акциясы өтті
Қаламызда «Таза Қазақстан» республикалық экологиялық акциясы аясында «Таза су айдындары» акциясы ұйымдастырылды. Бұл іс-шараға Самарқанд су қоймасының жағалау аймағын тазалауға «Жасыл ел» жастар еңбек жасақтарының сарбаздары белсенді түрде атсалысты.
– «Жасыл ел» жасақтарының сарбаздары Самарқанд су қоймасындағы «Таза су айдындары» экоакциясын белсенді түрде қолдауда. Біз Теміртау қаласының барлық тұрғындары мен қонақтарын біздің бастамамызды қолдап, экологияны жақсартуға бағытталған іс-шараларға қатысуға шақырамыз», – деді «Жасыл ел» жобасының бас үйлестірушісі Мирас Яуда.
«Жасыл ел» еңбек жасақтарының сарбаздары мұндай бастамалардың су айдындарының демалыс орындарын ретке келтіруге ғана емес, сонымен қатар, жастар арасында қоршаған ортаға ұқыпты қарау мәдениетін тәрбиелеуге ықпал ететінін атап өтті.
– Менің ойымша, жастарды осындай қызықты жобаларға тарту өте маңызды. Бұл оларға тазалықты сақтаудың үлгісі болады. Қазақстанның әр қаласында «Жасыл ел» сияқты жобалар болуы керек деп ойлаймын. Олар балалардың ашылуына, сондай-ақ, елдің экологиясын қалпына келтіруге көмектеседі, – дейді “Жасыл ел” сарбазы.
«Таза су айдындары» акциясына Қарағанды облысының экология департаментінің өкілдері, төтенше жағдайлар басқармасының қызметкерлері және жергілікті атқарушы органдардың қызметкерлері де қатысты. Тазалау барысында қатысушылар 50 қап қоқыс жинады. Енді тұрғындардың демалыс кезінде тазалықты сақтауы маңызды.
– Бұл – қоршаған ортаны және Самарқанд су қоймасының тазалығын қорғауға өз үлесімізді қосуға тамаша мүмкіндік. Теміртау қаласының тұрғындарынан қоқыс пен пластикалық қалдықтарды қалдырмауды сұраймын, – деді Теміртау қаласының мемлекеттік экологиялық инспекторы Сабит Ұзақбаев.
«Таза су айдындары» акциясы су айдындарының тазалығы әр адамның жауапкершілігінде екенін тағы да дәлелдеді. Ұйымдастырушылар барлық қала тұрғындарын осындай экологиялық іс-шараларға қосылуға шақырады. Теміртау қаласында өткен бұл акцияның маңызы зор, себебі ол тек қана экологиялық тазалықты сақтауға емес, сонымен қатар, жастарды тәрбиелеуге, оларға қоршаған ортаға ұқыпты қарау мәдениетін сіңіруге бағытталған.
Өз тілшімізден.
