Қарағанды облысында мүгедектігі бар мыңнан астам адам жұмысқа орналастырылды

Қарағанды облысында мүгедектігі бар адамдар үшін жұмыс орындарының квотасы екі есеге ұлғайды. Жұмыспен қамтуды қамтамасыз етуде мемлекеттік қолдаудың барлық шаралары қолданылады. Мысалы, өз ісін ашуға 61 грант берілді.

– Бүгінде мүгедектігі бар 1120 адам жұмыспен қамтуға жәрдемдесудің барлық шараларымен қамтамасыз етілді. Бос жұмыс орындарына 358 адам жұмысқа орналастырылды. Әлеуметтік жұмыс орындарына 15, қоғамдық жұмыстарға – 290 адам жолданды. «Күміс жас» жобасы бойынша 106 адам жұмыс тапты. Сондай-ақ, «Бірінші жұмыс орны» жобасы, Жастар тәжірибесі жобалары да көмектеседі, – деді Жұмыспен қамтуды үйлестіру және әлеуметтік бағдарламалар басқармасының басшысы Әсем Жүніспекова аппараттық кеңесте.

Оның айтуынша, биыл 89 кәсіпорында бірінші, екінші және үшінші топтағы мүгедектер үшін 219 жұмыс орнына квота белгіленген. Сонымен қатар, жұмыс берушілер мүгедектіктің үшінші тобындағы есту қабілеті бұзылған адамдар үшін 11 арнайы жұмыс орны құрылды. Қарағандыда екі жұмыс орнына тағы бір өтінім қол қою сатысында.

Кәсіпкерлік негіздеріне оқыту «Бастау Бизнес» жобасы бойынша жүргізіледі. Бизнес-жобаларды қорғағаннан кейін өз ісін ашуға грант алуға мүмкіндік бар.

Әсем Жүніспекова сәтті мысалдар келтірді.

Абай ауданының Ягодное ауылында тұратын бірінші топтағы мүгедек Виктор Колесников жұмыссыз отырған, ал қазір кәсіпкер. Өз жылыжайында өсірілген көкөністерді сатады.

Анатолий Мясников гранттық қаражатқа лазерлік станок пен қажетті құрал-жабдықтар сатып алды. Интерьерге арналған панель жасайды.

Мүгедектігі бар және оларға күтім жасайтын адамдар үшін Террикон алқабында цифрлық кәсіптерді оқыту жобасы жалғасуда.

Облыс әкімі Ермағанбет Бөлекпаев жұмыспен қамтуды қолдаудың барлық шаралары туралы халыққа көбірек айтуды тапсырды.

– Мүгедек адамдарды жұмысқа орналастыру бойынша бірқатар шаралар жүзеге асырылды. Жұмыстар жүргізілуде, бірақ одан да көп жұмыс істеу керек, – деді ол.

Қарағанды облысында мүгедектігі бар 55 мыңға жуық адам тұрады, олардың жартысына жуығы еңбекке жарамды. Жұмысшылар – 11 мыңға жуық.