Қазақстанда уақыт белдеуінің халыққа әсері зерттеледі: Үкімет 100 млн теңге жұмсамақ

Қазақстанда уақыт белдеуінің тұрғындарға әсерін зерттеу мақсатында үкімет 100 миллион теңгеден астам қаражат бөлмек. Бұл туралы Мәжіліс кулуарында Ғылым және жоғары білім министрі Саясат Нұрбек мәлімдеді.

Министрдің айтуынша, қазіргі уақытта бұл жобаға 160 миллион теңге көлемінде өтінім түскен. Алайда, қаражат мөлшері 90-100 миллион теңгеге дейін қысқаруы мүмкін.

Жуырда өткен Жоғары ғылыми-техникалық комиссия отырысында зерттеу жобасына байланысты негізгі мәселелер қаралды. Алдағы уақытта конкурс жарияланып, Ұлттық ғылыми кеңес зерттеудің нақты құнын анықтайды.

Саясат Нұрбектің сөзінше, үкімет Қазақстанда бірыңғай уақыт белдеуін сақтап қалу туралы шешім қабылдағанына қарамастан, бұл зерттеу маңызды. Себебі, қоғамдық сұраныс жоғары болған. Денсаулық сақтау министрлігі де жобаны толық қолдаған.

> «Қоғамдық сұраныс болды, сондықтан біз жауап беруге мәжбүрміз. Денсаулық сақтау министрлігі толық қолдау білдірді, ал біз грант бөлетін ұйым ретінде бұл жобаны қолдадық,» – деді министр.

Кілт сөздер: уақыт белдеуі, Қазақстан, зерттеу, үкімет, Саясат Нұрбек, қаржы.