Өндірістегі тұрақтылықтың негізі – жұмысшы кадр
Қазіргі таңда кез келген өндіріс орнының табысты әрі тұрақты жұмысы ең алдымен білікті жұмысшы кадрларға тікелей тәуелді. Жаңа технология мен заманауи құрал-жабдық қаншалықты дамығанымен, оны тиімді қолданатын, істің тетігін меңгерген маман болмаса, нәтиже де мардымсыз болмақ. Сондықтан өндірістің берік іргетасы – тәжірибелі де жауапты жұмысшы.
Өндіріс – үздіксіз қозғалысты талап ететін сала. Әрбір ауысым, әрбір жұмыс процесі өзара тығыз байланыста жүзеге асады. Осы жүйенің бір буыны әлсіресе, тұтас өндіріс тізбегінде іркіліс туындайды. Ал бұл тұрақтылыққа тікелей әсер етеді. Сол себепті әр жұмысшының кәсіби даярлығы, еңбекке деген жауапкершілігі мен тәртібі аса маңызды.
Бүгінгі таңда жұмысшы кадрларға деген сұраныс артып келеді. Әсіресе техникалық және өндірістік бағыттағы мамандықтарға қажеттілік жоғары. Бұл – еңбек нарығындағы нақты жағдайдың көрінісі. Сондықтан кәсіби-техникалық білім беру ұйымдарының рөлі де жыл санап күшейіп келеді. Олар өндіріс үшін қажетті кадрларды даярлап, жастарды нақты еңбекке бейімдеуге жол ашады.
Жас маманның өндірісте тұрақтап қалуы үшін тек білім ғана емес, қолайлы еңбек жағдайы мен әлеуметтік қолдау да қажет. Жұмыс орнының қауіпсіздігі, еңбек заңнамасының сақталуы, әділ жалақы – жұмысшының өз ісіне деген сенімін арттыратын маңызды факторлар. Осындай жағдай жасалған ортада еңбек адамы өз кәсібіне адал болып, өндірістің дамуына барынша үлес қосады.
Өндірістегі тұрақтылық – кездейсоқ құбылыс емес. Ол күнделікті тынымсыз еңбектің, тәртіптің, өзара жауапкершіліктің нәтижесі. Осы жолда жұмысшы кадр – алдыңғы шептегі негізгі күш. Олардың кәсіби шеберлігі мен табандылығы болмаса, өндірістік өсім мен экономикалық даму да мүмкін емес.
Қорытындылай келе, өндірістің сенімді тірегі – адам. Ал сол адамның ішінде ең үлкен салмақты арқалап тұрғаны – жұмысшы кадр. Еңбек адамына құрмет көрсету, оның жағдайын жақсарту – ел экономикасының тұрақты болашағына салынған берік негіз.
Оспанова Замзагуль Кажмукановна
Қаражал қалалық мәсслихатының төрағасы
