Премьер-министр Бектенов әкімдерге жылу беру маусымына қатысты тапсырма берді
Олжас Бектеновтің төрағалығымен өткен Үкімет отырысында жылу беру маусымының басталуына байланысты мәселелер қаралды, – деп хабарлайды тілшісі 247media.kz Үкіметтің баспасөз қызметіне сілтеме жасап.
Премьер-министр жылу беру уақтылы жүзеге асырылғанын атап өтті – ешқандай үзілістерге жол берілмеді, алдағы күндері еліміздің оңтүстік өңірлерінде де жылу беріледі.
«Үлкен жұмыс атқарылды. Оны бөлінген қаржы көлемінен де, жүргізілген жұмыс ауқымынан да байқауға болады. Енді ең бастысы – жылу беру маусымын қалыпты деңгейде өткізіп, жоспарланған барлық параметрлерді сақтай білу. Коммуналдық кәсіпорындардың жөндеу бөлімшелерін қажетті құрал-жабдықтармен қамтамасыз ету маңызды», – деді Үкімет басшысы.
Өңірлердің әкімдеріне жылу беру маусымының барлық мәселелерін жеке бақылауда ұстау тапсырылды.
Бүгінде еліміздің бірқатар облыстарында жылу көздерінің резервтік жабдықтарында жөндеу жұмыстары жалғасуда, жоспарлы жобалар іске асырылып жатыр.
