Теміртауда ескі ауыз су құбырлары өшіріледі

Теміртау қаласының тұрғындары үшін жаңа су құбырларына қосылу маңызды мәселе болып отыр. Жаңа су құбырлары негізінен Соцгород, Оң жақ жағалау және Ескі қала аудандарын қамтиды. Құрылыс жұмыстары аяқталғанымен, көптеген тұрғындар әлі күнге дейін жаңа жүйеге қосылуға асығар емес. Егер олар осы күзге дейін қосылмаса, ескі су құбыры жабылып, тұрғындар сусыз қалу қаупімен бетпе-бет келеді.

Жобаның жалпы ұзындығы 46,9 км-ді құрайды. Жаңа су құбырына 1244 үй қосылады деп жоспарлануда. Оның ішінде 607 жаңа тұтынушыға алғаш рет су беріледі, ал 673 тұтынушы авариялық учаскелерден қосылуға тиіс. «Аква-трейдинг» ЖШС-нің басшысы Аякөз Смағұлованың айтуынша, тамыз айының соңында ең көп авариялық учаскелерден кезең-кезеңімен су ажырату басталады. Ең алдымен Зелёная, Шевченко және Песчаная көшелерінің тұрғындары сусыз қалады.

Оң жақ жағалауда мердігер жұмыстарын аяқтаған, ал қазір жұмыстар Ескі қала мен Соцгород ауданында аяқталуға жақын. Аякөз Смағұлова қазіргі уақытта ПИК (КСК), ОКМС және тұрғын үй инспекциясы бірге жұмыс істеп, тұрғындарды жаңа жүйеге қосуы керектігін айтады. Мердігердің жұмысы аяқталған, егер қандай да бір мәселелер туындаса, оларды қазір шешу қажет. Әрине, кепілдік бар, мердігер жергілікті, бірақ мұндай жұмыстарды жылы мезгілде жүргізген дұрыс.
Қазіргі уақытта тұтынушылардың шамамен 40%-ы жаңа жүйеге қосылған жоқ, бұл 120-дан астам үйді құрайды. Коммуналдық қызметкерлердің айтуынша, мұның негізгі себебі – адам факторы. Кейбір адамдар соңғы сәтке дейін күтеді, ал басқаларына қаржылық жағдайлары кедергі келтіреді. Заң бойынша, жаңа желі құдыққа дейін жеткізіледі, ал құдықтан ары қарайғы шығындар тұтынушының мойнына жүктеледі. Жұмыстың құны әр үйге жеке есептеледі. Егер бұрын су құбыры болмаған болса, тұрғындарды күштеп қосуға болмайды, олар скважина суын пайдалана беруіне болады және кез келген уақытта құбырға қосылу мәселесін шеше алады.
Жаңа су құбырына қосылу үшін «Аква-трейдинг» мекемесіне барып, рұқсат алу қажет, әйтпесе қосылу заңсыз болып есептеледі. Ескі тұтынушылар жұмыс барысында техникалық шарттарды алып, құжаттарын жаңарта алады.
Сонымен қатар, заңсыз су жүйесіне қосылу мәселесі де өзекті болып отыр. Кейбір тұрғындар есептегіштерді орнатпайды, ал басқалары бақшаны суару үшін есептегіш құралдарын айналып өтетін шлангтарды шығарады, тағы біреулері қажетті құжаттарды рәсімдемейді. Заңсыз қосылым үшін 92 мыңнан 518 мың теңгеге дейін айыппұл қарастырылған. Мұндай жағдайлар әсіресе Соцгородта көптеп кездеседі. Соңғы екі айда шамамен 40 үйде заңсыз қосылымдар анықталды. Қазіргі уақытта тәртіп бұзушылардан шамамен 3,5 миллион теңге айыппұл өндірілуде. Тұтынушыларды жаңа су құбырына толық қосу жұмыстарын қыркүйек айының соңына дейін аяқтау жоспарлануда.

Өз тілшімізден.