7–9 Мамыр: Ұлы Жеңістің, Ерліктің және Отан қорғаушылардың мерекесі

Жыл сайын мамыр айының алғашқы жартысында Қазақстан халқы ерекше толқумен, терең сезіммен маңызды үш күнді қарсы алады: 7 мамыр – Отан қорғаушылар күні, 8 мамыр – Еске алу күні, 9 мамыр – Ұлы Жеңіс күні. Бұл күндер – тек тарих емес, әр отбасының жүрегінде, әр азаматтың санасында мәңгілік орын алған қасиетті күндер. Бұл мерекелердің әрқайсысы Қазақстан халқы үшін ерекше мәнге ие, себебі оларда Отанға деген сүйіспеншілік, бейбітшілік үшін күрес, ерлік пен жанқиярлықтың үлгісі жатыр. Енді осы күндерге жеке-жеке тоқталайық.

7 мамыр – Қазақстан Республикасының Қарулы күштерінің құрылған күні. Бұл күннен бастап еліміздің әскери қауіпсіздігін қамтамасыз етуге бағытталған заманауи, кәсіби армия қалыптаса бастады.

Қазіргі таңда сарбаздар мен офицерлердің әскери дайындықтары, патриоттық рухы, заманауи қару-жарақпен қамтамасыз етілуі – егемендіктің тірегі. Бұл күні барлық әскери қызметшілер мен ардагерлерге ерекше құрмет көрсетіледі. Әскерде қызмет ететін жігіттер мен қыздар, құқық қорғау органдары қызметкерлері – барлығы Отанымыздың тыныштығы үшін жанқиярлықпен қызмет етеді.

8 мамыр – көптеген әлем елдерінде Екінші дүниежүзілік соғыстың аяқталуына арналған Еске алу күні. Бұл – майдан даласында ерлікпен қаза тапқандарды, концлагерьлерде қырылғандарды, тылда еңбек етіп, өмірін сарп еткендерді еске алу күні. Қазақстан Екінші дүниежүзілік соғыста айрықша рөл атқарды: 1,2 миллионнан астам қазақстандық майданға аттанды. Олар Брест қамалынан бастап Берлинге дейін жетті, Мәскеу түбінде, Сталинград шайқасында, Курск шайқасында, Украинаны, Белоруссияны, Польшаны азат етуде шайқасты. Олардың жартысынан астамы майданнан оралмады. Сонымен бірге Қазақстан тылда да жан аямай еңбек етті. Фронтқа азық-түлік, оқ-дәрі, киім-кешек, қару-жарақ жөнелтті. Заводтар мен фабрикаларда, колхоздарда әйелдер, қариялар, жасөспірімдер күндіз-түні жұмыс істеді. 8 мамырда біз осылардың барлығын еске алып, қаза тапқандардың рухына тағзым етеміз. Бұл – қайғы мен үміттің, қасірет пен жеңістің араласқан күні.

Ал, 9 мамыр – қазақ халқы үшін, бүкіл посткеңестік кеңістік үшін ерекше, қасиетті күн. 1945 жылы дәл осы күні нацистік Германия сөзсіз тізе бүккені жарияланып, Ұлы Отан соғысы аяқталды. Ұлы Жеңіс күні – тек тарихи дата емес. Бұл – бүгінгі бейбіт аспанымыздың, тыныштық пен бақыттың бағасы. Соғысқа қатысқан әр жауынгер, әр офицер, әр тыл еңбеккері өз үлесін қосты, жеңіс жолын жақындатты.

Бүгінгі күні бұл мереке ардагерлерді ұлықтау, олардың ерлігін еске алу, ұрпақ санасына патриоттық сезім ұялату үшін өткізіледі. Әскери шерулер, митингтер, гүл шоқтарын қою рәсімдері, ардагерлермен кездесулер – бұлардың бәрі біздің тарихымызды, ұлттық жадымызды сақтаудың маңызды элементтері.

Өскелең жас ұрпақ үшін әр ардагердің айтқан естелігі – болашақ ұрпақ үшін баға жетпес сабақ. Олардың көзін көріп, батасын алу – бізге тағдыр сыйлаған үлкен мүмкіндік.  Отан қорғаушылар күні мен Жеңіс күні бір-бірімен тығыз байланысты. Өткеннің батырлары бүгінгі сарбаздарға жол көрсетті, ал бүгінгі Қарулы күштер сол батырлық дәстүрді жалғастырып келеді. Қазіргі таңда әлемде тұрақсыздық көбейіп, түрлі әскери қақтығыстар орын алып жатқанда, мемлекеттің қуатты армиясы – тәуелсіздіктің, бейбітшіліктің кепілі. Бұл мерекелер – жастар үшін үлкен сабақ. Ерлік пен отансүйгіштік, бірлік пен ынтымақ – мәңгілік құндылықтар. Жастардың бойында патриоттық сезімді тәрбиелеу – мемлекеттің де, отбасының да, мектептің де ортақ міндеті.

Бүгінгі ұрпақ бейбіт аспан астында өмір сүріп, білім алып, армандап, мақсат қоя алады. Бұл – ата-бабамыздың жанқияр күресінің нәтижесі. Сондықтан тарихты ұмытпау, ардагерлердің аманатын сақтау, елдің дамуына үлес қосу – әр азаматтың борышы. 7–9 мамыр – тарихымыздың ұлы беттері. Бұл күндерде біз өткенімізді еске алып, бүгінгі бейбіт өміріміздің қадірін түсініп, болашағымызды ойлаймыз. Батырларымызға бас иіп, сарбаздарымызға алғыс айтып, туған елімізді қорғауға, нығайтуға, дамытуға бар күшімізді салайық. Бірлік пен бейбітшілік – еліміздің басты байлығы. Мерекелер құтты болсын! Ардагерлеріміз аман болсын! Әрдайым аспанымыз ашық, еліміз тыныш болсын!

«Орталық» өңірлік қолбасшылығы қолбасшысы

генерал-майор Сакентай Амантайұлы Шекарбеков