Тоқаев БРИКС саммитінде қандай мәлімдеме жасады
Мемлекет басшысы БРИКС дамудың орасан зор әлеуеті бар және әртүрлі континенттердегі мемлекеттерді біріктіретін, ынтымақтастықты нығайтып, барлық қатысушылардың игілігі үшін бірлескен мүмкіндіктерді тиімді пайдаланатын жаһандық тартылыс орталығына айналғанын атап өтті.
«БРИКС-те ортақ гүлдену, өзара құрмет пен серіктестік қағидаттарына негізделген болашақ құру үшін ресурстар да, тәжірибе де бар. БРИКС-ке мүше әрбір мемлекетпен шынайы достық қарым-қатынаста болуымыз Қазақстан үшін өте маңызды.БРИКС-тің көпжақты күш-жігері міндетті және жаһандық құрылым болып қала беретін БҰҰ қызметін үйлесімді түрде толықтыратыны сөзсіз».Қасым-Жомарт Тоқаев
Мемлекет басшысы атап өткендей, Қазақстан Ресейдің өзара сенім мен ынтымақтастықты нығайту арқылы геосаяси шиеленісті бәсеңдетуге бағытталған Еуразияда тең және бөлінбейтін қауіпсіздікті құру тұжырымдамасын жоғары бағалайды.
«Қазақстан Қытайдың халықаралық тұрақтылықты сақтауға, егемендікті қорғауға, көпжақты тәсілдерді қолдануға және жанжалдарды бейбіт жолмен шешуге бағытталған жаһандық қауіпсіздік саласындағы бастамасын қолдайды.Қазақстан, жалпы, Қытай мен Бразилияның Украинаға қатысты бейбітшілік жоспарын қолдайды. Біздің еліміз БРИКС-ке мүше мемлекеттердің Таяу Шығыстағы жағдайдың шиеленісуіне байланысты алаңдаушылығын бөліседі, бұл көптеген құрбандар мен гуманитарлық апатқа алып келді. Кедейлік, теңсіздік және білімнің жетіспеушілігі сияқты қақтығыстардың негізгі себептерін бірлесіп шешу, біздің ойымызша, халықаралық саяси ынтымақтастықты нығайтудың негізгі факторы болып қала береді».Қасым-Жомарт Тоқаев
Ол сондай-ақ Қазақстан БҰҰ Қауіпсіздік Кеңесін реформалауды және оның Африка, Латын Америкасы және Азия елдерінен жаңа мүшелерді қосу үшін кеңейтілуін қолдайтынын атап өтті.
«Бейбітшілік пен қауіпсіздік мәселелерін шешуде жаһандық оңтүстік елдерінің дауысы естілуі керек. БРИКС жаһандық басқару құрылымындағы орта державалар мен дамып келе жатқан экономикалар деп аталатын елдердің өкілдігін күшейту арқылы бұл үдерісте шешуші рөл атқара алады. Қазақстан БРИКС-ті жаһандық прогрестің драйверлерінің бірі ретінде қарастырады».Қасым-Жомарт Тоқаев
Еске салайық, Қасым-Жомарт Тоқаев Владимир Путиннің шақыруымен 2024 жылғы 23 қазанда БРИКС мемлекет басшыларының XVI саммитіне қатысу үшін Қазан қаласына жұмыс сапарымен келді. Мемлекет басшысы саммитке қатысушылармен, соның ішінде ҚХР Төрағасы Си Цзиньпинмен және Әзірбайжан Президенті Ильхам Әлиевпен бірқатар әңгімелесті.
