Қарағанды облысында биыл 673 шақырым жол жөнделеді
Биыл Қарағанды облысында 673 шақырым автожолды жөндеу жоспарланған. Жұмыстар республикалық және облыстық жолдарды, сондай-ақ қалалар мен ауылдардың ішіндегі жолдарды қамтиды. Сапаға ерекше назар аударылады: әрбір нысан мамандардың оң қорытындысы болған жағдайда ғана тапсырылады. Бұл туралы Өңірлік коммуникациялар қызметінде өткен брифингте айтылды.
Жолаушылар көлігі және автомобиль жолдары басқармасы басшысының міндетін атқарушы Мақсат Мұқашев атап өткендей, биыл көлік қолжетімділігін жақсартуға және жол төсемінің төзімділігін арттыруға баса назар аударылды.
– Біз жай ғана жөндеу емес, жоспарлы жаңғырту жұмыстарын жүргізіп жатырмыз. Мысалы, жолдар жоғары жүктемеге төтеп беруі үшін асфальт екі қабат етіп төселеді. Сондай-ақ, «Ауыл – Ел бесігі» арнайы жобасы бойынша ауылдық жерлердегі жолдар жаңартылуда. Жөндеу жұмыстарымен Абай, Бұқар жырау, Шет және Осакаров аудандарын қоса алғанда, 7 ауданның 24 ауылында 110 км қамту жоспарланып отыр. Жоба асфальт төсеуді ғана емес, оған іргелес аумақтарды, жол жиектері мен тротуарларды абаттандыруды да көздейді, – деді Мақсат Мұқашев.
Сонымен қатар, Нұра, Шерубай-Нұра және Есіл өзендері арқылы өтетін үш көпір қайта жөнделеді. Мәселен, биыл Қарағанды – Тоғызқұдық, Осакаровка – Молодежный және Саран жағына шығу жолдары жаңартылады. Барлық трассаларға екі қабат асфальт төселеді – беріктігі мен қызмет ету мерзімін арттыру үшін.
Қарағандыға ерекше көзқарас. Қарағанды қаласы әкімінің орынбасары Рүстем Қожақапановтың айтуынша, биылдың өзінде облыс орталығында 110 шақырымнан астам жол жөнделеді. Бұл жаңа учаскелердің құрылысы, ескі көшелердің күрделі жөндеуі.
– Маңызды міндет – нормативтік жағдайдағы жолдардың үлесін 85%-ға дейін жеткізу. Жеке секторды қоса алғанда, барлық аудандарда жұмыстар жүргізілуде. Біз шұңқырларды жөндеуді бастадық, сонымен қатар қаланың негізгі көшелерін қайта жөндеу жұмыстары жүргізілуде, – деп атап өтті ол.
Маңызды нысандардың ішінде Космонавттар мен Бөкетов, Мұқанов көшелерін, сондай-ақ орамаралық жолдарды қайта жаңарту бар. Пичугин мен Четская көшелеріне күрделі жөндеу жұмыстары жүргізілуде. Орташа жөндеу Ермеков, Университет, Назарбаев, Ерубаев, Гоголь, Тәттімбет және басқа да көшелерде жүргізіледі.
Сондай-ақ, жол-көлік инфрақұрылымын дамыту үшін 35-ші бағыттағы автожолды қайта құру жобасы әзірленді.
Биыл Қарағанды – Балқаш автожолын жөндеу аяқталуы тиіс. Бүгінде қозғалыс төрт жолақпен жүріп жатыр. Абаттандыру жұмыстары: таңбалар, белгілер, қоршаулар қалды.
Сондай-ақ, республикалық маңызы бар негізгі жолдардың 232 шақырымы орташа жөндеумен қамтылады, оның ішінде Қарағанды – Аягөз – Тарбағатай – Бұғаз, Астана – Теміртау, Қызылорда – Жезқазған, Қарағанды – Шідерті, Астана – Қарағанды (айналма жолмен) – Алматы. Жол өткелдеріндегі шөгулерді жою және деформациялық жіктерді жөндеу жоспарлануда.
Жезқазған-Қарағанды автожолын жөндеуге ЖСҚ әзірлеу аяқталды. Қайта жаңартудан кейін жол II техникалық санатқа көшіріледі және климаттық тұрғыда орнықты болады, бұл жыл бойы қол жетімділікті қамтамасыз етеді және жол жүру уақытын қысқартады.
Сондай-ақ ірі магистральдарда жүк көлігін автоматты түрде өлшеудің қосымша кешендері орнатылады – барлығы сегіз нүкте болады.
Жол жұмыстарын бақылау күшейтілуде, сапаға ерекше көңіл бөлінуде. Жол активтері сапасының ұлттық орталығы филиалының бөлім бастығы Манас Тұрар атап өткендей, барлық нысандар міндетті тексеруден өтеді. Қазірдің өзінде 30-ға жуық асфальт зауыты тексерілді, олардың біреуі ғана нормаларға толық сәйкес келді. Жол активтерінің сапасын тексеру аспаптық тексерулерді де қамтиды.
– Тексеру қорытындысы бойынша 2024 жылы жөнделген учаскелерде ақаулар анықталған жоқ. Жөндеу жұмыстары осыдан 2–3 жыл бұрын жүргізілген жерде кемшіліктер бар, олардың барлығы бекітілген және кепілдік міндеттемелер шеңберінде мердігерлерге жоюға бағытталған, – деп хабарлады Манас Тұрар.
