Күрестен ӘЧ: Омар Нәдіров қола жүлда алу үшін Еуропа чемпионатының жүлдегерлерін жеңуі керек
Тирана қаласында өтіп жатқан әлем чемпионатында еркін күрес палуандары бозкілемге шықты.
Спортты дамыту дирекциясының мәліметінше, іріктеу нәтижесінде ертең жұбаныш белдесуінде Ұлттық құрама сапынан Омар Нәдіров бақ сынайды. Аса ауыр салмақтағы (125 кг) отандасымыз Еуропа чемпионатының (U23) күміс жүлдегері украиналық Володимир Кочановпен күреседі.
Жеңіске жетсе, жастар арасындағы Еуропа чемпионатының күміс жүлдегері Айдын Ахмадовқа (Әзірбайжан) қарсылас болады.
Сондай-ақ ертең еркін күрестен 57, 65, 70, 79 және 97 кг дейінгі салмақтағы іріктеу өтеді. Белдесулер Астана уақытымен сағат 13:30-да басталады.
Бұған дейін Қазақстан балуандары әйелдер күресінен әлем чемпионатын жүлдесіз аяқтағанын жазған болатынбыз.
