Теміртау қаласында жыл мұғалімі таңдалды
Теміртау қаласына «Жыл мұғалімі – 2024» қалалық педагогикалық шеберлік байқауының жеңімпазы анықталды. Нәтижесінде дене шынықтыру пәнінің оқытушысы Жандос Сембаев жыл мұғалімі атанды.
Кәсіби шеберлік таразыланған байқаудың ақтық мәресінде қала мектептерінен келген сегіз педагог өзара кім мықтыны анықтады. Педагоктар үш кезең бойынша сынға түсті: Бұл «Мұғалімнің визит карточкасы», «Таратуға тұрарлық педагогикалық идея» тақырыбында ораторлық шеберлікті көрсету және «Мұғалімнің жексенбі күні» атты үй тапсырмасы. Мұнда педагогтар дәстүрлі қатал ұстаз бейнесінен шығып, мұғалімнің ең алдымен жарқын тұлға екенін көрсетті.
Байқау қорытындысы бойынша бас жүлдені – әйелдер гимназиясының дене шынықтыру пәнінің мұғалімі Жандос Сембаев қанжығалады. Оған 100 000 теңге сомасына сертификат табысталды. Дәл осындай ақшалай сертификаттарға байқаудың басқа да жүлдегерлері ие болды.
– Бар білгенін бала бойына сіңіріп, тарыдай болып келген оқушыны «таудай» етіп шығаратын ол мұғалім мамандығы. Ұстаз болашақтың іргетасын қалайды. Өйткені, сенің алдымен адам, онан соң маман болуың да көп жағдайда осы оқытушыға байланысты.Мұғалім де үйренуден оқудан жалықпауы керек. Бұл байқау жай ғана жарыс емес, педагогикалық шеберлік пен шабыттың нағыз мерекесі, – дейді Дене шынықтыру мұғалімі
Жандос Сембаев байқаудың облыстық кезеңіне жолдама алды.
