Жұмысшы мамандықтары – өркениет діңгегі

Еңбек мәдениеті – кез келген мемлекеттің даму деңгейін айқындайтын басты көрсеткіштердің бірі. Қазақстан үшін жұмысшы мамандықтарының маңызы тек экономикалық қажеттілікпен шектелмей, ұлттық құндылықтарды сақтаудың да өзекті тетігі болып табылады.
«Жұмысшы мамандықтар жылы» – еңбек адамының қоғамдағы мәртебесін нығайтуға бағытталған кешенді бастама. Бұл шара аясында өндірістік кәсіпорындар мен оқу орындары арасындағы байланыс күшейіп, кәсіби мамандарды даярлау ісінде жаңа жобалар жүзеге асуда.
Жұмысшы мамандығы – тек күнделікті еңбектің көрінісі емес, ол – елді алға сүйрейтін стратегиялық күш. Бүгінгі заман талабына сай, әрбір дәнекерлеуші, механизатор, құрылысшы немесе теміржолшы жаңа технологияны меңгеріп, цифрлық білімін жетілдіруге ұмтылуы тиіс. Бұл – елдің жаһандық нарықтағы бәсекеге қабілеттілігінің кепілі.
Еңбек адамына құрмет көрсету – жастарға өнеге. Кәсіби мамандықтарды дәріптеу арқылы біз жас буынды адалдыққа, жауапкершілікке және елге қызмет етуге тәрбиелейміз.

Бойцун Вера Викторовна
Құқық қорғау органдарының ардагері