Қарағанды облысының тұрғындарына қардың күрт еруіне байланысты үндеу жасалды

Қарағанды облысында тұрғындарды өз аулаларындағы қарды тазалауға шақырды. Қардың еруі басталғандықтан, су басу қаупі артып отыр, сондықтан аула аумақтарын дер кезінде тазалау маңызды.

Қала және аудан әкімдері халыққа қар тазалауды кейінге қалдырмауға шақырып, үндеу жасады: коммуналдық қызметтер көшелер мен қоғамдық орындарды тазалап жатыр, алайда аулалар тұрғындардың өз жауапкершілігінде.

«Қардың белсенді еру кезеңі басталды. Қазір көп нәрсе тек коммуналдық қызметтерге ғана емес, өзімізге де байланысты. Барлық тұрғындарды аулаларын қардан тазалауға шақырамыз. Коммуналдық қызметтер көшелерді тазалауға жұмылдырылған. Жағдай тұрақты бақылауда және мониторинг жүргізілуде», – делінген үндеуде.

Қазгидромет мәліметінше, облыс аумағының 60%-ы қармен жабылған, өзендердегі су деңгейі қалыпты шекте.

Елді мекендерден 1,8 миллион текше метрден астам қар шығарылған. Сонымен қатар су өткізу құбырлары, арналар мен арықтар тазартылып, қорғаныс бөгеттері нығайтылуда. Өзендерде мұз кептелістерінің алдын алу үшін жарылыс жұмыстары жүргізілуде.

Облыс әкімі Ермағанбет Бөлекпаев Бұқар жырау, Нұра және Осакаров аудандарындағы су тасқыны қаупі бар ауылдарды аралап шықты. Жергілікті жерлерде әкімдер мен ТЖД өкілдері бірлесіп, аумақтарды тұрақты түрде бақылауда ұстап отыр.

Барлық қызметтер көктемгі су тасқыны кезеңінде тәуекелдерді азайту және халықтың қауіпсіздігін қамтамасыз ету үшін күшейтілген режимде жұмыс істеуде. Қосымша ретінде ықтимал қауіпті аймақтарға ТЖД күштері мен техникасы жіберілді.