Ферроқорытпа зауытындағы өрт: Қарағандыда 4 жұмысшының өмірін жалмаған апатқа қатысты сот процесі басталды
Қарағандыда YDD Corporation ферроқорытпа зауытына қатысты сот процесі басталды. Бұл туралы 247media.kz ақпарат агенттігі Информбюро бағдарламасына сілтеме жасап хабарлайды.
Биыл 20 шілдеде пештен кенеттен жалын шығып, 4 жұмысшы қаза тауып, тағы 4 адам жарақат алған еді. Сонымен бірге прокурордың араласуынан кейін ғана зауытқа төтенше жағдайлар тобы іске қосылды.
Төтенше жағдай таңғы 4-те болған. Бірақ төтенше жағдайлар бөліміне бұл туралы хабарлама 2 сағаттан кейін ғана келген. Сондай-ақ хабарлама зауыт өкілдерінен емес, Ұлттық қауіпсіздік комитетінен түскен. Прокуратураның араласуынан кейін де өрт сөндірушілері бар екі өрт сөндіру көлігі зауытқа уақытында кіргізілмеген. Үш адамнан тұратын жедел жұмыс тобы ғана кірген. Зауыт әкімшілігі де жедел жәрдем шақырмаған.
Терісін 100%-ға дейін күйік шалған 8 жұмысшы ауруханаға жөнелтілген. Олардың төртеуі жансақтау бөлімінде көз жұмды. Бұл ретте зауыт өкілі тағылған айыпты негізсіз деп санайды. Олар жазатайым оқиға туралы еңбек инспекциясына, өнеркәсіптік қауіпсіздік басқармасына және полицияға хабарлағанын айтады. Ал өрт сөндірушілерді тергеушілердің жұмысына кедергі келтірмес үшін ішке кіргізбедік дейді. Зауыт өкілі жағдайға қатысты пікір беруден бас тартты.
“Бізді 35-40 минуттай нысанның ішіне кіргізбеді. Басшылық рұқсат бермей жатыр деді. Сосын прокуратураға хабарластық. Оқиға орнынан келген прокурор бақылау-өткізу пунктін шақырып, сол жерден ішке кіруге рұқсат берілді”, – деді Қарағанды төтенше жағдайлар бөлімінің инженері Нұржан Рахман.
Еске салайық, 20 шілдеде Қарағанды ферроқорытпа зауытында төтенше жағдай болып, 8 жұмысшы әртүрлі дәрежеде жарақат алғанын жазған едік. Кейін YDD Corporation ферроқорытпа зауытындағы төтенше жағдайға басты кінәлі жұмыс беруші болып шықты.
Зауытқа мәжілістің экс-спикері Нұрлан Нығматулиннің сыңары – мәжіліс пен сенаттың бұрынғы депутаты Ерлан Нығматулин иелік етеді.
