Өңір өркендесе – ел дамиды
Қазақстан қоғамдық-саяси жаңғырудың маңызды кезеңінен өтіп отыр. Мемлекеттік басқару жүйесіндегі өзгерістермен бірге азаматтардың билік пен саяси институттарға қоятын талабы да арта түсті. Бүгінде жұрт ел көлемінде қабылданған шешімдердің өзі тұратын қала мен ауылдың тынысынан нақты көрініс тапқанын қалайды.
23 тамызда Құрылтай депутаттарының сайлауы өтеді. Конституциялық жүйе жаңарған кезеңде ұйымдастырылатын бұл саяси науқанның ел үшін маңызы зор. Әсіресе, өңірлер үшін алдағы сайлаудың мәні бөлек. Өйткені мемлекеттік саясаттың нәтижесі ең алдымен халықтың күнделікті өмірінен – жолдың сапасынан, жұмыс орындарының ашылуынан, инфрақұрылымның жағдайынан және әлеуметтік қызметтердің қолжетімділігінен байқалады.
Еліміздің әр өңірінің өзіндік ерекшелігі бар. Бір аймақта экономиканың негізін өнеркәсіп пен тау-кен өндірісі құраса, енді бірінде ауыл шаруашылығы, кәсіпкерлік, көлік немесе қызмет көрсету саласы басым. Сондықтан олардың алдында тұрған міндеттер де бірдей емес.
Кейбір елді мекендер үшін жол мен инженерлік желілерді жаңарту өзекті болса, басқа аумақтарда жаңа жұмыс орындарын ашу, өндірісті дамыту, қалалар мен ауылдарды абаттандыру немесе әлеуметтік қызметтердің сапасын арттыру маңызды. Шалғай елді мекендерде медицина, білім, байланыс және көлік мәселелері әлі де күн тәртібінен түскен жоқ.
Осы себепті өңірлердің дамуын бір ғана үлгімен жоспарлау мүмкін емес. Әр аумақтың экономикалық әлеуеті, географиялық жағдайы және тұрғындардың нақты сұранысы ескерілуге тиіс. Жасалып жатқан мүмкіндіктер тек ірі қалалармен шектелмей, аудан орталықтары мен шағын ауылдарға да жетуі маңызды.
Өңірдің әлеуетін тиімді пайдалану дегеніміз – жергілікті өндірісті қолдау, кәсіпкерлікке жағдай жасау, тұрақты жұмыс орындарын ашу және халықтың тұрмыс сапасын жақсарту. Бұл ретте жергілікті мәселелерді жақсы білетін азаматтардың пікірі ескеріліп, билік пен қоғам арасында тұрақты байланыс орнауы қажет.
Алдағы сайлау науқаны – саяси күштердің ел мен өңірлерді дамытуға қатысты ұстанымдарын таныстыратын маңызды алаң. Партиялардың бағдарламаларында экономика, жұмыспен қамту, кәсіпкерлік, ауылдық аумақтарды дамыту, әлеуметтік саясат, энергетика, азық-түлік қауіпсіздігі және жастарды қолдау мәселелері қамтылады.
Саналы таңдау жасау үшін сайлаушы саяси бағдарламалармен танысып, олардың өңірдегі өзекті мәселелерді шешуге қаншалықты бағытталғанына назар аударуы керек. Өйткені сайлау – тек белгілі бір саяси күшке дауыс беру емес, ел дамуының алдағы бағытына қатысты азаматтық ұстанымды білдіру.
Сондықтан 23 тамыздағы сайлау жаңа мемлекеттік институтты қалыптастырумен ғана шектелмейді. Бұл – туған қаламыз бен ауылымыздың, тұтас өңірдің және еліміздің болашағы туралы ойланатын маңызды кезең.
Елдің болашағы елордада қабылданған шешімдерден ғана емес, әр өңірдегі нақты істерден құралады. Өңірлер қуатты болса, мемлекет те орнықты дамиды.
Нұрлыхан Қалқаманұлы
